Lekha Books

"சரிங்கக்கா" கூறிய பொன்னி, மடமடவென வேலைகளைச் செய்ய ஆரம்பித்தாள்.

"அண்ணாதுரை, டீ குடிக்கறீங்களா. போடட்டுமா?"

"ஓ... போடுங்களேன்."

அர்ச்சனா, டீ தயாரிக்கும்பொழுது அவள் கூடவே நின்று வேடிக்கை பார்த்தான் அண்ணாதுரை. சளசளவென்று அரட்டை அடித்துக் கொண்டே டீயைக் குடித்தான்.

அவன் பேசுவதைக் கேட்டு, ஊமையாகிக் கிடந்த அர்ச்சனாவின் உள்ளம் ஊஞ்சலாடியது. தன் பங்கிற்கு தன் கல்லூரி கதைகளைப் பற்றி, சிநேகிதிகள், நண்பர்கள் பற்றியும் உரையாடி மகிழ்ந்தாள்.

டீயைக் குடித்த பின் இருவரும் ஹாலுக்கு வந்தனர்.

"அண்ணி, உங்களுக்கு மெல்லிசை மன்னர் எம்.எஸ்.வியோட பாடல்கள் பிடிக்கும்னு சொன்னீங்க? அவரோட பாடல்கள்ல எந்தப் பாட்டு உங்களுக்கு ரொம்ப பிடிக்கும்?"

"சர்க்கரையில எந்த சர்க்கரை இனிப்பா இருக்கும்னு கேக்கறீங்க. இருந்தாலும் சொல்றேன். அவரோட துள்ளிசைப் பாடல்கள் ரொம்பப் பிடிக்கும்."

"துள்ளிசையா? அப்பிடின்னா?"

"எம்.ஜி.ஆர். ஸார் படங்கள்ல்ல வர்ற சுறுசுறுப்பான பாடல்களுக்கு துள்ளிசைன்னு பேர் வச்சிருக்கேன். சிவாஜி ஸார் படங்களுக்கு அவர் போடற மெட்டுகள் மெல்லிசையா இருக்கும். இது போக, அவரோட தத்துவப் பாடல்கள், தாலாட்டுப் பாடல்கள், சோகப்பாடல்கள் அத்தனையும் கேட்க கேட்கத் திகட்டாத தேனமுதமாச்சே... அவரோட 'எங்கே நிம்மதி...’ பாடலுக்குரிய பின்னணி இசை பிரம்மாண்டமா இருக்கும்..."

"எனக்கு இசைஞானி இளையராஜா சாரோட பாடல்கள்னா உயிர். ஒரு புதுமையான பாணியை இசை உலகில் உருவாக்கினவர் அவர். 'அந்த நிலாவைத்தான் நான் கையில புடிச்சேன் பாட்டு, ஆளை மயங்க வைக்கற பாட்டு. இன்னிக்கு நிறைய புது ம்யூசிக் டைரக்டர்ஸ் வந்து ரொம்ப நல்லாத்தான் ட்யூன் போடறாங்க. ஆனா அதையெல்லாம் நாலஞ்சு தடவை மட்டுமே கேக்கறதுக்கு நல்லா இருக்கு. அதுக்கு மேல கேக்க முடியலை. ஆனா பழைய பாடல்களையெல்லாம் இன்னிக்கும் திரும்பத் திரும்ப கேட்க முடியுது. அலுக்கறதே இல்லை. என்னோட கார்ல இளையராஜா சாரோட சி.டி.தான் எக்கச்சக்கமா வச்சிருக்கேன். கார்ல போகும்போது அந்தப் பாடல்களையெல்லாம் கேட்டுக்கிட்டே போனா ஜாலியா இருக்கும். எவ்வளவு தூரம் ட்ராவல் பண்ணோம்னே தெரியாது. அவ்வளவு சுகமா இருக்கும்."

"அது சரி... படிச்சு முடிச்சுட்டு பிஸினசுக்கு வந்துட்டீங்க. உங்க பிஸினஸ் சம்பந்தப்பட்ட விஷயங்கள் போக வேற எதில உங்களுக்கு அதிக ஈடுபாடு?"

"பிஸினஸ் வேலை தவிர வேற என்ன பண்றேன்னா... நிறைய கோவில்களுக்குப் போவேன். பாண்டிச்சேரியில ஒரு சாயிபாபா கோயில் இருக்கு. அங்கே போவேன். பஞ்சவடியில ஆஞ்சநேயர் கோயில் இருக்கு. அங்கே போவேன். யாராவது புதுசா, எனக்குத் தெரியாத கோயில் பத்தி சொன்னாங்கன்னா உடனே அங்கே போயிடுவேன். அந்தந்த கோயில் தல வரலாறு பத்தி விலாவாரியா தெரிஞ்சுக்கறதுல எனக்கு ஆர்வம் அதிகம்."

"உங்க வயசுக்கு இந்த ஆர்வம் அதிகம்தான். ஆச்சர்யமும் கூட. ஆனா கண்ட கண்ட விஷயங்கள்ல மனசை ஈடுபடுத்தறதை விட இந்த மாதரி நல்ல விஷயங்களை தெரிஞ்சு வச்சுக்கறது பாராட்டுக்குரியது..."

"உங்க பாராட்டுக்களுக்கு நன்றி அண்ணி. உங்களுக்கு எதில இன்ட்ரஸ்ட் அதிகம்?"

"நான் நிறைய படிப்பேன். புத்தகங்கள் வாசிக்கறது எனக்குசுவாசிக்கற மாதிரி. அவ்வளவு இஷ்டம். டி.வி. பார்க்கறதெல்லாம் ரொம்ப கம்மி. அது எனக்குப் பிடிக்காது."

"எந்த மாதிரி புக்ஸ் படிப்பீங்க? இங்கிலீஷ் நாவல்களா?"

"ம்கூம். தமிழ்தான். கதைகள்ன்னா எனக்கு ரொம்ப பிடிக்கும். ராஜேஷ்குமாரோட க்ரைம் நாவல்கள் படிக்கறதுன்னா சாப்பாடு, தண்ணி தேவை இல்லை. அந்த அளவுக்கு இஷ்டம். நாவலோட முதல் பக்கத்தை ஆரம்பிச்சா முடிவு வரைக்கும் படிச்சுட்டுதான் நாவலை கீழே வைப்பேன். அனுராதா ரமணனோட கதைகள்ல, யதார்த்த நடைமுறை வாழ்க்கை அப்பிடியே நம்ம கண்ணுக்கு தெரியும். இது போக சுஜாதாவோட கதைகள், மதன் ஜோக்ஸ் இப்படி வெரைட்டியா படிப்பேன். கவிஞர் வைரமுத்துவோட எல்லா புத்தகமும் படிச்சுடுவேன். அவருக்கு கடவுள் குடுத்திருக்கற ஞானம்! அதைப்பத்தி எடுத்து சொல்றதுக்கு வார்த்தைகளே இல்லை."

"புக்ஸ் படிக்கற அளவுக்கெல்லாம் எனக்குப் பொறுமை இல்லை அண்ணி. நல்ல படங்கள் வெளிவந்தா பேசாம மாயாஜால் போயிடுவேன். சேர்ந்தாப்ல ரெண்டு சினிமா பார்த்துட்டு வந்துடுவேன். மத்தபடி எனக்கு இந்த டி.வி. பார்க்கற பழக்கமெல்லாம் கிடையாது."

"தியேட்டர் போய் சினிமா பார்ப்பீங்களா? ஹய்யோ... எவ்வளவு நல்லா இருக்கும்? படம் பார்த்தா தியேட்டர்ல பார்க்கணும் இல்லைன்னா சும்மா இருக்கணும். அதை விட்டுட்டு, இந்த வி.சி.டி., டி.வி.டி.யெல்லாம் போட்டுப் பார்க்கறதே எனக்குப் பிடிக்காது. இந்த விஷயத்துல நான் ரொம்ப கண்டிப்பு."

"கண்டிச்சு சொன்னாலும் யார் அண்ணி டி.வி.டி. பார்க்காம இருக்கா?"

"வாழ்க்கை முறை அப்பிடி மாறிடுச்சு அண்ணாதுரை. வீட்ல உட்கார்ந்த இடத்துல இருந்தபடி பார்க்கக் கூடிய வசதியை மக்கள் லேசுக்குள்ள விடுவாங்களா என்ன? வெளியில தியேட்டருக்கு போறதுக்காக கிளம்பணும். போறதுக்குரிய வாகன வசதி வேணும். இப்பிடி எதுவுமே மெனக்கெடாம சுலபமா வீட்லயே சினிமா பார்க்கற வசதியை யார் விட்டுக் குடுப்பாங்க? நம்பளை மாதிரி சில பேர்தான் தியேட்டர்ல மட்டும் சினிமா பார்க்கணும்னு விடாப்பிடியா இருப்பாங்க. நவீன வசதிகளை நல்ல விதமா பயன்படுத்திக்கணும்... "

"பயனுள்ள பல விஷயங்களைத் தள்ளிட்டு, வீண் பொழுது போக்கறவங்களை திருத்தவே முடியாது..."

"திருத்த முடியாத நபர்கள் நம்ம நாட்டில நிறைய பேர் இருக்காங்க... எனக்கு மட்டும் சக்தி இருந்தா... அப்படிப்பட்ட நபர்களை நானே என் கையால சுட்டுத் தள்ளிடுவேன்..." தன் கணவன் தியாகுவின் அடாவடியான செயல்களை மனதில் கொண்டு பேசியதால் அவளையறியாமலே அவளது குரலின் தொனியில் சற்று கடுமை ஏறி இருந்தது. அவளது வாயிலிருந்து வெளிவந்த வார்த்தைகளில் வன்மை கூடி இருந்தது. இதை உணர்ந்த அண்ணாதுரை எதுவும் புரியாமல் திகைத்தான்.

"என்ன அண்ணி... சாதாரணமான சின்ன விஷயத்துக்கு இவ்வளவு டென்ஷன் ஆகிட்டீங்க?!... "

"அ... அ... அது ஒண்ணுமில்ல... சு... சும்மாத்தான். சரி, சரி பொன்னி முன் வேலைகளை முடிச்சிருப்பா. நான் போய் கடகடன்னு பிரியாணி தாளிச்சுட்டு, சிக்கனை வறுத்துட்டு வந்துடறேன்."

"நானும் கூடவே வர்றேன்." என்றபடியே சமையலறைக்கு நடந்த அர்ச்சனாவைப் பின் தொடர்ந்தான் அண்ணாதுரை.

அர்ச்சனா சமையல் வேலைகளை கவனித்துக் கொண்டிருக்கும்பொழுது அவளிடம் பல பொது விஷயங்களை விவாதித்தான் அண்ணாதுரை. அவன் கூறிய சுவாரஸ்யமான தகவல்களை ரசித்தபடியே மிக விரைவாக சமையலை முடித்தாள் அர்ச்சனா. தக்காளி பிரியாணியின் மணம் மூக்கைத் துளைக்க, சிக்கன் வறுவலின் வாசனை நாவில் நீரூற வைத்தது.