Lekha Books

அது ஒரு சிலை அல்ல என்பதையும், மனிதன்தான் என்பதைப் பற்றிய உண்மையையும் முழு உலகத்திற்கும் தான் கூறப் போவதாகவும் அவள் சொன்னாள்.

ராஜகுமாரி எப்போதும் மென்று கொண்டிருக்கும் இலையால் உண்டான மயக்கத்தில் அப்படித் தோன்றுகிறது என்றும், அது ஒரு சிலைதான் என்றும் கூறி நிலைமையைச் சரிகட்ட முயற்சித்த தீருலாலைப் பார்த்து அவள் பலமாக சத்தம் போட்டாள். அவள் அவரை மிகவும் கொடூரமானவர் என்றும் திருடன் என்றும் ஏமாற்றுப் பேர்வழி என்றும் மாறி மாறிச் சொன்னாள். தனக்கு அதிகாரம் இருந்தால், அந்த நிமிடமே தீருலாலை துப்பாக்கியால் சுட்டுக் கொன்று விடுவேன் என்றும் அவள் கர்ஜித்தாள்.

இறுதியில் சிலைக்கு உயிர் இருக்கிறது என்பதை அவர் ஒப்புக் கொள்ள வேண்டியதிருந்தது.

அப்படி ஒப்புக் கொண்டவுடன், அதை உடனடியாக விடுதலை செய்ய வேண்டுமென்று சொன்னாள் ராஜகுமாரி. அது அப்படி போக வேண்டியதில்லையென்றும், தன்னுடைய வேளையில் சந்தோஷம் கண்டு சுகமாக வாழ்ந்து கொண்டிருக்கும் ஒரு அப்பாவி ஊழியனின் தனிப்பட்ட வாழ்க்கையை ராஜகுமாரி அழிக்கிறாள் என்றும் அவர் ராஜாவிற்கு முன்னால் குற்றச்சாட்டு சொன்னார்.

ராஜா மிகவும் குழப்பத்திற்குள்ளானார். இறுதியில் மறுநாளே சிலை சம்பந்தமாக முடிவு எடுக்கலாம் என்ற தீர்மானத்துடன், அன்றைய கூட்டம் பிரிந்தது.

அதற்குப் பிறகு நிலைமையைக் காப்பாற்றுவதற்குத் தன்னுடைய போக்கை மாற்றிக் கொள்வதைத் தவிர தீருலாலிற்கு வேறு வழியில்லாமல் போய்விட்டது.

மறுநாள் ராஜகுமாரி கண் விழித்தபோது முதலில் கண்ட காட்சி - கேட்டில் நின்று கொண்டிருந்த சிலை மனிதன்தான் என்ற ரகசியத்தைத் தீருலால் கொண்டாட்டத்துடன் உலகத்திற்கு அறிவித்துக் கொண்டிருந்ததுதான்.

7. போட்டி

இரண்டாவது படையெடுப்பிலும் தோல்வியைச் சந்தித்ததுடன், அருந்ததி தன்னுடைய பைத்தியக்காரத்தனமான போராட்டத்திலிருந்து பின்வாங்கிவிட்டாள் என்றுதான் தீருலால் அதற்குப் பிறகு இவ்வளவு காலமும் மனதில் நினைத்திருந்தார்.

அதற்குப் பிறகும் ராஜகுமாரி கோட்டைக்குள் வந்து தங்கியிருக்கிறாள் என்றாலும், அவளும் தீருலாலும் ஒருவரையொருவர் கண்களுடன் கண் சந்தித்ததில்லை. ஆரம்பத்தில் ராஜாவின் வைப்பாட்டியாக வந்து கொண்டிருந்த ராஜகுமாரி, ஒரு அதிகாலை வேளையில் தன்னுடைய வைப்பாட்டி பதவியை விட்டெறிந்தாள். நடுத்தர வயதைத் தாண்டிய மகாராஜாவைத் தூக்கியெறிந்துவிட்டு, முழுமையான சுதந்திரம் கொண்ட பெண்ணாக ஆனபிறகும், "ராஜகுமாரி" என்ற அழைப்பும், பின்பற்றிச் செல்லும் கூட்டமும் அந்த அழகியை விடாமல் பின்தொடர்ந்தன. ராஜாவிடமிருந்து அபகரித்த அளவற்ற செல்வம் ராஜ வாழ்க்கையைத் தொடர அவளுக்கு உதவியது. விருப்பப்படும் வாழ்க்கையை வாழும் அந்தப் பேரழகி, இப்போதும் போதையைத் தரும் இலையை மெல்வது உண்டு என்ற விஷயத்தை உள்ளுக்குள் நடுக்கத்துடன் தீருலால் நினைத்துப் பார்த்தார். தன்னுடைய தந்திரத்திற்கு முன்னால் முழங்காலிட்டது காரணமாக இருக்க வேண்டும்- பிறகு கோட்டைக்கு வந்தபோது ஒருமுறைகூட அவள் துவாரபாலகனுக்கு அருகிலேயே செல்லவில்லை. அது அவருக்கு ஒரு பெரிய நிம்மதியான விஷயமாக இருந்தது. அந்த நிம்மதியைத்தான் அவள் இப்போது தட்டித் தகர்த்திருக்கிறாள்.

ராஜகுமாரி சிலையை அசைய வைப்பதற்காக வரும் செய்திக்கு, மிகப்பெரிய அளவில் விளம்பரத்தை கோட்டையின் விளம்பரப் பிரிவு செய்திருந்தது. மிகவும் சீக்கிரமே தூர இடங்களில்கூட அது ஒரு சுவாரசியமான பேச்சுக்கான விஷயமாக மாறியது. நிகழ்ச்சியைப் பற்றிய விஷய விவரங்களைக் கேட்டு, பல ஊர்களில் இருந்தும் வர ஆரம்பித்த தொலைபேசி அழைப்புகள், கடிதங்கள் ஆகியவற்றின் எண்ணிக்கை நாட்கள் செல்லச் செல்ல அதிகரித்துக் கொண்டேயிருந்தன. பரிசு பற்றிய மாறுபட்ட தகவல் போட்டியைப் பற்றிய மதிப்பை ஒட்டு மொத்தமாக உயர்த்தியது. ராஜகுமாரி வரப்போகிறாள் என்பது இன்னொரு ஈர்ப்புக்குரிய விஷயமாக இருந்தது. அந்த அழகின் சின்னத்தைப் பற்றிக் கேள்விப்பட்டிருக்கும் ஏராளமான பேர் அவளை நேரடியாகப் பார்க்கக் கூடிய அந்த அரிய சந்தர்ப்பத்தைப் பயன்படுத்திக் கொள்ள வேண்டும் என்று தீர்மானித்ததைத் தொடர்ந்து, அனுமதிச் சீட்டுக்களின் கட்டணம் திடீரென்று உயர்ந்தது. தீருலாலின் ரகசியமான பின்துணையுடன் திருட்டுத்தனமாகவும் டிக்கெட் விற்பனை நடைபெற்றது.

போட்டிக்கான நாள் நெருங்க நெருங்க தீருலாலின் மனதில் இருந்த அழுத்தம் அதிகமாகிக் கொண்டே வந்தது. ஒருவேளை ராஜகுமாரி வெற்றி பெற்றுவிட்டால், தனக்கு உண்டாகப் போகிற மிகப்பெரிய பொருளாதார இழப்பையும் அவமானத்தையும் நினைத்துப் பார்த்தபோது, இப்படியொரு ஒப்பந்தத்திற்கு சம்மதித்ததே முட்டாள்தனமான காரியம் என்று அவருக்குத் தோன்றியது.

போட்டி நடப்பதற்கு இரண்டு நாட்களுக்கு முன்பு ஒரு அதிகாலை நேரத்தில் அவர் சுப்பனின் அறைக்குச் சென்று காத்திருந்தார். சுப்பன் அன்றும் சரியான நேரத்திற்கு வந்து சேர்ந்தான்.

தன்னைச் சுற்றி இப்படியொரு போட்டி நடக்கப் போகிறது என்ற விவரத்தை சுப்பன் விளம்பரங்களைப் பார்த்துத் தெரிந்து கொண்டிருக்கிறான் என்பதைத் தவிர, அதற்கு அவன் அந்த அளவிற்கு முக்கியத்துவம் தந்ததாகத் தெரியவில்லை. எவ்வளவோ போட்டிகள் நடைபெற்றிருக்கின்றன. அதைப் போல இதுவும் ஒன்று.

ஆனால், விஷயத்தை மேலும் சற்று தீவிரமாக எடுத்துக் கொள்ள வேண்டுமென்பதையும், இந்த முறை கிடைக்கக் கூடிய பரிசு மாறுபட்டது என்பதையும் தீருலால் ஞாபகப்படுத்தினார். ராஜகுமாரி அந்தப் பரிசைத் தட்டிச் சென்றால், அதன் விளைவு மரணம்தான் என்று அவர் அவனுக்கு எச்சரித்தார். மந்திர வித்தைகளையும் பிசாசுக்களின் மந்திரங்களையும் தெரிந்திருக்கும் அவள், நரபலி கொடுப்பதற்காகத்தான் சிலையைத் தன்னுடன் கொண்டு செல்லப் போகிறாள் என்று தீருலால் சொன்னார். அதைக் கேட்டதும் சுப்பனுக்கு பயம் தோன்றியது. எந்தவொரு காரணத்தைக் கொண்டும் தான் அசையப் போவதில்லை என்று அவன் முதலாளிக்கு வாக்குறுதி அளித்தான். அவனுடைய வார்த்தைகள் உறுதியாக வந்ததைக் கேட்டவுடன், தீருலாலின் மனதில் முழுமையான நிம்மதி உண்டானது.

போட்டி நடப்பதற்கு முந்தைய நாளன்று சாயங்காலம் ராஜகுமாரியும் அவளுடைய ஆட்களும் அங்கு வந்து தங்க ஆரம்பித்தார்கள். காட்டேஜ்களில் நான்கைந்தை அவர்களுக்காகப் பதிவு செய்திருந்தார்கள்.

ராஜகுமாரியுடன் வந்திருந்தவர்களில் பெரும்பாலானவர்கள் பெண்களாக இருந்தார்கள். மெய்க்காப்பாளர்கள், மூட்டை தூக்குபவர்கள், துப்பாக்கி ஏந்தியவர்கள் என்று இருந்த நான்கைந்து ஆண்களை நீக்கிப் பார்த்தால், மற்றவர்கள் எல்லாரும் பார்ப்பதற்கு மிகவும் அழகான இளம்பெண்களாகவே இருந்தார்கள். போட்டி பற்றி தீர்மானிக்க வந்த இளம்பெண்தான் அந்தக் கூட்டத்தினரின் எல்லா நடவடிக்கைகளுக்கும் தலைமை தாங்கினாள்.

அவளை மட்டுமே தீருலால் பார்த்திருக்கிறார். மக்கள் கூட்டம் எங்கு இருக்க வேண்டும் என்பதைப் பற்றியும், அவர்கள் எப்படி நடந்து கொள்ள வேண்டும் என்ற முறைகளைப் பற்றியும் அவள் தீருலாலுடன் மீண்டுமொருமுறை விவாதித்தாள்.