என்னை கவர்ந்த திரைப்படங்கள் -  சுரா (Sura)

தி சாங்க் ஆஃப் ஸ்பேரோஸ் (The Song Of Sparrows)

ஈரானிய திரைப்படம்

2008ஆம் ஆண்டில் திரைக்கு வந்த படம். பல மிகச் சிறந்த திரைப் படங்களை இயக்கி, உலக அளவில் அருமையான ஒரு பெயரைப் பெற்றிருக்கும் Majid Majidi  இயக்கியிருக்கும் படம்.

நெருப்புக் கோழிகள் வளரக் கூடிய ஒரு பண்ணையில் பணி செய்யும் கரீம் என்ற நடுத்தர வயது கொண்ட ஏழை மனிதனைப் பற்றிய கதையே இது.

Majid Majidiயின்  படங்களில் வழக்கமாக இருக்கக் கூடிய யதார்த்தம், மண் வாசனை, இயல்பான நடிப்பு வெளிப்பாடு, வித்தியாசமான கதைக் கரு, மாறுபட்ட கதைக் களம், வாழ்க்கையின் சந்தோஷங்களையும், சோகங்களையும் உயிரோட்டத்துடன் காட்சிகளின் மூலம் வெளிப்படுத்தக் கூடிய அபார திறமை, சிறிய கதாபாத்திரத்திடமிருந்து கூட ஆச்சரியப்படும் அளவிற்கு திறமையைக் கொண்டு வரும் இயக்குனரின் ஆற்றல் - அனைத்துமே இந்தப் படத்திலும் இருக்கின்றன.

ஆரம்பத்திலிருந்து இறுதி வரை ஒரு திரைப்படத்தைப் பார்க்கிறோம் என்னும் உணர்வே நமக்கு உண்டாகாமல், நெருப்புக் கோழிகள் இருக்கக் கூடிய ஒரு பண்ணையில் பணியாற்றும் ஒரு மனிதனின் சிரமங்கள் நிறைந்த வாழ்க்கையையே நேரில் பார்க்கிறோம் என்று தோன்றக் கூடிய அளவிற்கு ஒரு படம் இருக்கிறது என்றால், அது நூறு சதவிகிதம் அப்படத்தை இயக்கிய இயக்குனரின் முழு வெற்றிதானே!

சரி... அந்த அளவிற்கு சிறப்புத் தன்மைகள் கொண்ட ‘The song of sparrows’  படத்தின் கதைதான் என்ன?

டெஹ்ரானுக்கு வெளியே நெருப்புக்கோழிகள் இருக்கக்கூடிய ஒரு பண்ணை. கிராமப் பகுதியில் மிகவும் அமைதியாக இருக்கக் கூடிய அந்த பண்ணையில் உயரமான கால்களையும் நீளமான கழுத்தையும் வைத்துக் கொண்டு ஒய்யாரமாக நடந்து கொண்டிருக்கும் நெருப்புக் கோழிகளின் சத்தத்தைத் தவிர வேறு எந்த சத்தமும் கேட்காது. அங்குதான் கரீம் பணியாற்றுகிறான். நடுத்தர வயதைக் கொண்ட அவன் மெலிந்த சரீரத்தைக் கொண்டவன். அந்த நெருப்பு கோழிகளைத் தவிர, அவனுக்கு வேறு உலகமே இல்லை.

வேலி போட்ட பண்ணைக்குள் வளரும் நெருப்பு கோழிகளை பிரச்னைகள் இல்லாமல் பார்த்துக் கொள்வது, அவற்றுக்கு இரை போடுவது, அவற்றை முட்டை போட வைப்பது, அவை முட்டை போட்டால் அவற்றை பத்திரமாக பாதுகாத்து வைப்பது, அடை காக்க வைப்பது, வெளியே வரும் குஞ்சுகளை மிகவும் கவனம் செலுத்தி வளர்ப்பது, தாய் கோழிகளையும் குஞ்சுகளையும் நோய் வராமல் பார்த்துக் கொள்வது, வேலியைத் தாண்டி அவை வெளியே ஓடி விடாமல் எச்சரிக்கையுடன் இருப்பது, வேறு பிராணிகள் எதுவும் சாப்பிட்டு விடாமல், நெருப்புக் கோழிகளை கண்ணும் கருத்துமாக பார்த்துக் கொள்வது- இவைதான் கரீமின் வேலை. சொல்லப் போனால்- இருபத்து நான்கு மணி நேரமும் அவன் நெருப்புக் கோழிகளைப் பற்றியும், அந்த பண்ணையைப் பற்றியுமே நினைத்துக் கொண்டிருக்க வேண்டும். அந்த பண்ணையை விட்டு சிறிது நேரம் கூட அவன் வெளியே கூட போக முடியாது.

அவனுடைய மனைவி நர்கீஸ். அவர்களுக்கு மூன்று பிள்ளைகள். தன் மனைவி, பிள்ளைகளுடன் ஒரு சிறிய வீட்டில் அவன் வாழ்ந்து கொண்டிருக்கிறான். தன் மனைவியின் மீதும், பிள்ளைகளின் மீதும் அவனுக்கு அளவற்ற அன்பும், பாசமும். இயன்ற வரையில், அவர்களை அவன் சந்தோஷமாக வைத்திருக்கிறான்.

ஒரு நாள் அவன் பண்ணையில் இருந்த போது, சீக்கிரமாக வீட்டிற்கு வரும்படி அவனுக்கு தகவல் வருகிறது. காரணம் - அவனுடைய மூத்த மகள் ஹனியேவின் காதில் பொருத்தும் கேட்கும் கருவி காணாமல் போய் விட்டதுதான். அவன் வீட்டிற்குச் செல்லும்போது, அவனுடைய மகன் ஹுசைனும், பக்கத்து  வீடுகளில் இருக்கும் சிறுவர்களும் அந்த பகுதியில் சாக்கடையைப் போல தேங்கிக் கிடக்கும் நீரில் அந்த கேட்கும் கருவியைத் தேடிக் கொண்டிருக்கிறார்கள். அந்த இடத்திற்கு வந்ததற்காக தன் மகனையும் மற்ற சிறுவர்களையும் கரீம் சத்தம் போடுகிறான். அதே நேரத்தில்- அவர்களுடன் அவனும் சேர்ந்து அந்த கேட்கும் கருவியைத் தேடுகிறான். அந்தத் தேடலுக்கு மத்தியில், தேங்கிக் கிடக்கும் அந்த குட்டையைச் சுத்தம் செய்து சீராக்கி, அதில் தங்க நிற மீன்களைக் கொண்டு வந்து வளர்த்து பெரிய பணக்காரர்களாக ஆகலாம் என்ற ஆசையை அவனுடைய மகன் ஹுசைனும் மற்ற சிறுவர்களும் வெளியிடுகிறார்கள். அவர்களின் எண்ணத்தைக் காதில் போட்டுக் கொள்ளாத கரீம், அதற்கு எதிராக பேசுகிறான். எனினும், அந்த கேட்கும் கருவி அங்கு கிடைத்து விடுகிறது. ஆனால், அது ஒழுங்காக வேலை செய்யாமல் இருக்கிறது. அவன் மருத்துவமனையில் கொண்டு போய் அதை காட்டுகிறான். அந்த கேட்கும் கருவி கட்டணம் எதுவும் இல்லாமல் இலவசமாக சரி பண்ணி தரப்பட வேண்டுமென்றால், இன்னும் மூன்று அல்லது நான்கு மாதங்கள் அவன் அதற்காக காத்திருக்க வேண்டும் என்று அந்த மருத்துவமனையைச் சேர்ந்தவர்கள் கூறுகிறார்கள். அதற்கு முன்பு அது வேண்டும் என்று நினைத்தால், டெஹ்ரானுக்குச் சென்று அதைச் சரி பண்ணுவதே நல்லது என்று அவர்கள் கூறுகிறார்கள். தன்னுடைய மகளின் தேர்வு மிக விரைவில் வர இருப்பதால், அந்த கேட்கும் கருவி சீக்கிரமே சரி பண்ணப்பட்டாக வேண்டும் என்று நினைக்கிறான் கரீம்.

அந்தச் சம்பவத்திற்குப் பிறகு, ஒருநாள் புதிதாக வந்திருக்கும் நெருப்புக் கோழிகளை அவர்கள் பண்ணைக்குள் வரும்படி செய்து கொண்டிருக்கிறார்கள். அப்போது அங்கிருந்த ஒரு நெருப்புக் கோழி வெளியே ஓடி விடுகிறது. அது எங்கே போனது என்றே கரீமுக்குத் தெரியவில்லை. அந்த நெருப்புக் கோழி காணாமல் போனதற்கு கரீமின் கவனக் குறைவே காரணம் என்று குற்றம் சாட்டி, அவனை அந்த பண்ணையிலிருந்து வெளியேற்றி விடுகிறார்கள்.

வேலை இல்லாமற் போன கரீம், தன் மகளின் கேட்கும் கருவியைச் சீர் செய்வதற்காக டெஹ்ரானுக்கு வருகிறான். அதைச் சரி செய்ய வேண்டுமென்றால் 350,000 டொமான்கள் வேண்டுமென்று அங்கிருந்தவர்கள் கூறுகிறார்கள். அப்போது அங்கு பலரும் மோட்டார் சைக்கிள்களைச் சொந்தத்தில் வைத்துக் கொண்டு, அதில் ஆட்களை ஏற்றிக் கொண்டு போய் அவர்கள் விருப்பப்படுகிற இடத்தில் இறக்கி விடும் வேலைகளைச் செய்வதை அவன் பார்க்கிறான். அதற்கு ஒரு குறிப்பிட்ட தொகையைக் கட்டணமாக வாங்கி, அதை ஒரு தொழிலாகவே செய்து கொண்டிருப்பதைப் பார்க்கிறான். அவன் தன்னுடைய மோட்டார் சைக்கிளில் வர, அதில் ஒருவன் ஏறி ஒரு இடத்தில் கொண்டு போய் விடும்படி அவனைக் கேட்டுக் கொள்கிறான். கரீமும் அவனை ஏற்றிக் கொண்டு, அவன் சொன்ன இடத்தில் கொண்டு போய் இறக்கி விடுகிறான் அதற்கு அவன் ஒரு தொகையைக் கட்டணமாக தருகிறான்.

இந்த வேலையை ஒரு தொழிலாக தானும் செய்யலாமே என்ற எண்ணம் அப்போது அவனுக்கு உண்டாகிறது. தொடர்ந்து அந்த புதிய வேலையில் அவன் தன்னை முழுமையாக ஈடுபடுத்திக் கொள்கிறான். பரபரப்பான சாலைகளில், பல வாகனங்களையும் முந்திக் கொண்டு ஆட்களை பின்னால் உட்கார வைத்துக் கொண்டு அவன் ‘மோட்டார் சைக்கிள் ஓட்டுன’ராக விரைகிறான். ஆனால், அவன் அன்றாடம் சந்திக்கும் மனிதர்களும், அவர்கள் தங்களுடன் கொண்டு செல்லும் பொருட்களும் கரீம் என்ற நேர்மையான மனிதனைச் சோதனைக்குள்ளாக்குவதாக இருக்கின்றன.

உண்மையான, தவறு செய்யாத மனிதனாக இருந்து கொண்டு எளிய வாழ்க்கை வாழ்ந்து கொண்டிருந்த கரீம், அன்றாடம் மோட்டார் சைக்கிளில் ஆட்களையும் பொருட்களையும் ஏற்றி, கடுமையாக உழைத்து என்னதான் பணத்தைக் கொண்டு வந்தாலும், அதனால் மனதளவில் கவலைப்படுகின்றனர் அவனுடைய மனைவியும் மகள்களும். ஒவ்வொரு நாளும் அவன் பழைய பொருட்களை வீட்டிற்குக் கொண்டு வந்து தருகிறான். புதிது புதிதாக இதற்கு முன்பு பார்த்திராத பொருட்களைப் பார்க்க பார்க்க, அவனுடைய பேராசை அதிகமாகிக் கொண்டிருக்கிறது. மேலும் மேலும் பணம் சம்பாதிப்பதிலும், புதிய பொருட்களை வீட்டிற்குக் கொண்டு வந்து சேர்ப்பதிலுமே அவனுடைய முழு கவனமும் இருக்கிறது. காலப் போக்கில் - தன்னுடைய மகளிடம் கொண்டு வந்து கொடுக்க வேண்டிய hearing aid ஐயே அவன் மறந்து விடுகிறான்.

ஒரு நேர்மையான… கோடு போட்டுக் கொண்டு, அதில் நடந்து போய்க் கொண்டிருந்த கரீம், டெஹ்ரானில் கிடைத்த புதிய வேலையாலும், அறிமுகமான புதிய மனிதர்களாலும், தினந்தோறும் பார்த்த வினோதமான புதிய பொருட்களாலும் பலவித மாறுதல்களுக்கு ஆளாகிறான்.

சிறிதும் எதிர்பார்த்திராத பல புதிய பிரச்னைகளையும் அவன் வாழ்க்கையில் சந்திக்க வேண்டிய சூழ்நிலை உண்டாகிறது. மனதில் முழு அமைதியுடன் இருந்தவனுக்கு தினந்தோறும் சந்திக்கக்கூடிய பிரச்னைகளும் திருப்பங்களும் ஆச்சரியம் தரக் கூடியவையாக இருக்கின்றன.

எல்லாவற்றையும் சந்தித்துக் கொண்டு, அனைத்து விஷயங்களுடனும் போராடிக் கொண்டு வாழ்ந்து கொண்டிருக்கும் அவன் தன் கிராமத்திற்கு வந்து, ஏதோ சிந்தனையுடன் ஒரு திறந்த வெளியில் நடந்து போய்க் கொண்டிருக்க, என்றோ காணாமல் போன அந்த நெருப்புக் கோழி சற்று தூரத்தில் நடந்து போய்க் கொண்டிருக்கிறது.

காணாமல் போன நெருப்புக் கோழி மீண்டும் கிடைக்கிறது. அதை பண்ணைக்குள் கொண்டு வந்து அடைக்கிறான் கரீம். அதைத் தொடர்ந்து இடையில் காணாமல் போன மன அமைதியும் அவனுக்குக் கிடைக்கிறது.

எந்தவித பேராசையும் இல்லாமல், இயற்கையுடன் ஒன்றிப் போய் வாழ்ந்து கொண்டிருக்கும் அந்த நல்ல மனிதன், தன் இயல்புப் பாதையில் மீண்டும் தன் வாழ்க்கையை நடத்த ஆரம்பிக்கிறான்.

காணாமல் போன நெருப்புக் கோழி திரும்பவும் கிடைக்கும்போது, விண் அளவிற்கு சந்தோஷத்தில் திளைக்கும் கரீமுடன் நாமும் சேர்ந்து மகிழ்ச்சிக் கடலில் மூழ்குகிறோம்.

இந்தப் படத்தில் கரீமாக நடித்த Reza Naji சிறந்த நடிப்பிற்கான Asia Pacific Screen Awardஐப் பெற்றார். 81வது Academy Awardக்காக சிறந்த வேற்று மொழிப் படம் என்ற பிரிவில் பங்கு பெறுவதற்காக‘The song of Sparrows’ ஈரானின் சார்பாக அனுப்பி வைக்கப்பட்டது.

2008ஆம் ஆண்டில் பெர்லினில் நடைபெற்ற சர்வதேச திரைப்பட விழாவில் இந்தப் படத்தில் நடித்ததற்காக சிறந்த நடிகராக Reza Naji தேர்ந்தெடுக்கப்பட்டு, Silver Bear விருதைப் பெற்றார்.

Majid Majidi இயக்கும் படம் என்றால், பார்த்து எவ்வளவு வருடங்கள் கடந்தாலும், அதை நம்மால் மறக்கவே முடியாது. அதே போல ‘The song of Sparrows’திரைப்படமும் நம் உள்ளங்களில் எப்போதும் உயிர்ப்புடன் வாழ்ந்து கொண்டிருக்கும். Majid Majidiயும், கதாநாயகனாக நடித்த Reza Najiயும், நெருப்புக் கோழி பண்ணையும், நெருப்புக் கோழிகளும், அந்த கிராமமும், பரபரப்பான டெஹ்ரான் நகரமும், அதன் சாலைகளில் மிகவும் வேகமாக பாய்ந்தோடிக் கொண்டிருக்கும் வாகனங்களும், ஆட்களை கட்டணம் வாங்கிக் கொண்டு ஏற்றிக் கொண்டு செல்லும் மோட்டார் சைக்கிள் ஓட்டுனர்களும்....