என்னை கவர்ந்த திரைப்படங்கள் -  சுரா (Sura) 

Cast Away - காஸ்ட் அவே

(ஹாலிவுட் திரைப்படம்)

2000ஆம் ஆண்டில் திரைக்கு வந்து, மிகப் பெரிய வெற்றியைப் பெற்ற படம். பல வெற்றிப் படங்களின் இயக்குனரான Robert Zemeckis இயக்கிய இப்படத்தின் கதாநாயகன் Tom Hanks.

படத்தின் கதாநாயகனான Tom Hanks ஐச் சுற்றியே இப்படத்தின் முழு திரைக்கதையும் அமைக்கப்பட்டிருந்தது.

ஒரே மனிதன், ஒரே இடம் என்று அமைக்கப்பட்டிருக்கும் ஒரு கதைக் கருவை வைத்துக் கொண்டு 143 நிமிடங்கள், படத்தைப் பார்ப்போரை அமர்ந்திருக்கும் இடத்தில் சிறிதும் எழாமல் அப்படியே உட்கார வைப்பது என்பது சாதாரண ஒரு விஷயமல்ல. அப்படிப்பட்ட ஒரு மகத்தான செயலைச் செய்ததற்காகவே நாம் படத்தின் இயக்குனரான Robert Zemeckisஐ எவ்வளவு வேண்டுமானாலும் பாராட்டலாம்.

படத்தின் கதை இதுதான்:

1995ஆம் ஆண்டில் Chuck Noland என்ற இளைஞன் FedEx என்ற பிரபலமான கூரியர் நிறுவனத்தில் Systems Analyst ஆக பணியாற்றுகிறான். உலகமெங்கும் விமானத்தில் பயணம் செய்து அவன் அந்நிறுவனம் சம்பந்தப்பட்ட பிரச்னைகளைத் தீர்த்து வைப்பான். அவன் நீண்ட காலமாக Kelly Frears என்ற இளம் பெண்ணுடன் நட்பு கொண்டிருக்கிறான். அவளுடன் அவன் டென் னெஸ்ஸீயில் உள்ள Memphis என்ற இடத்தில் வாழ்ந்து கொண்டிருக்கிறான். அந்த இளம் ஜோடி திருமணம் செய்து கொள்ள வேண்டும் என்ற ஆசையை மனதில் கொண்டிருந்தாலும், Chuck இன் வேலைப் பளு அந்தக் காரியம் விரைவில் நடைபெறாமல் தள்ளிப் போட்டுக் கொண்டே வருகிறது.

இதற்கிடையில் ஒரு கிறிஸ்துமஸ் வருகிறது Chuckம் Kellyயும் தங்களுடைய உறவினர்களுடன் சந்தோஷமாக பண்டிகையைக் கொண்டாடிக் கொண்டிருக்கிறார்கள். அப்போது, தான் பணியாற்றும் நிறுவனத்திலிருந்து  Chuckகிற்கு ஒரு அவசர தகவல் வருகிறது. மலேஷியாவிற்கு உடனடியாக பயணம் செய்து, அங்கிருக்கும் ஒரு முக்கிய பிரச்னையை தீர்த்து வைக்க வேண்டும் என்று அவனுக்கு கட்டளை பிறப்பிக்கப்படுகிறது.

அவன் உடனடியாக அங்கிருந்து கிளம்பிச் செல்கிறான். விமானத்தில் பயணம் செய்யும்போது, அவன் சென்ற விமானம் சூறாவளி காரணமாக விபத்துக்குள்ளாகி, பசிபிக் கடலுக்குள் விழுந்து விடுகிறது. கடலுக்குள் விழும் Chuck, விமானத்தின் நொறுங்கி விழுந்த ஒரு பகுதியைப் பிடித்துக் கொண்டு தப்பித்து விடுகிறான். ஆனால், அவனுக்கு சுய உணர்வு இல்லாமற் போகிறது. இரவு முழுக்க அந்த விமானத்தின் நொறுங்கிய பகுதியுடன் கடலில் மிதக்கும் அவன், ஒரு தீவினை அடைகிறான்.

கண் விழித்துப் பார்த்தபோது, தான் ஒரு தீவில் இருப்பதையும், அங்கு பெயருக்குக் கூட ஆட்கள் யாரும் இல்லை என்பதும் அவனுக்கு தெரிகிறது. விமானத்திலிருந்து கடல் நீருக்குள் விழுந்த பல பெட்டிகளும் கடலில் மிதந்து வந்து கரையில் ஒதுங்கிக் கிடப்பதை அவன் பார்க்கிறான். அந்த பெட்டிகளுக்கு மத்தியில் விமானத்தின் பைலட்களில் ஒருவரின் இறந்த உடலும் மிதந்து கொண்டிருக்கிறது.

அந்த இறந்த உடலை கண்ணீர் மல்க, Chuck அங்கு புதைக்கிறான். அவன் அந்த தீவில் இருந்து கொண்டு சைகை செய்கிறான்... உரத்த குரலில் கத்துகிறான்... தன்னை யாராவது பார்க்க மாட்டார்களா என்று குதிக்கிறான்... கைகளை உயர்த்தி அழைக்கிறான். ஆனால், அவனை யாரும் பார்க்கவில்லை. அவனுடைய குரலை யாரும் கேட்கவில்லை.

அவனுக்கு என்ன செய்வது என்றே தெரியவில்லை. பசி எடுக்கிறது. தாகம் உண்டாகிறது. விமானத்திலிருந்து கீழே விழுந்த பெட்டிகளைப் பிரிக்கிறான். அவனுக்கு தேவைப்படும் பலவும் அவற்றில் இருக்கின்றன. ஒரே ஒரு பெட்டியை மட்டும் பிரிக்காமல், அப்படியே ஒரு ஓரத்தில் வைத்து விடுகிறான். அதில் இரண்டு சிறகுகள் வரையப்பட்டிருக்கின்றன.

சாப்பிடுவதற்கு ஏதாவது செய்ய வேண்டுமே! என்ன செய்வது என்று Chuck யோசிக்கிறான். அங்கிருந்த இரண்டு கற்களை எடுத்து உரசிப் பார்க்கிறான். அப்போது அவனுடைய கையில் காயம் உண்டாகி விடுகிறது. அந்த கோபத்தில் தன்னிடமிருந்த பல பொருட்களையும் அவன் கடலுக்குள் வீசி எறிகிறான். அவன் வீசி எறிந்த பொருட்களில் ‘Wilson Sporting Goods’ என்ற நிறுவனத்தின் எறிபந்தும் (Volley Ball)ஒன்று. விமானத்திலிருந்து கீழே விழுந்த பெட்டிகளில் ஒன்றில் அந்த பந்து இருந்தது. பின்னர் என்ன நினைத்தானோ, தான் வீசி எறிந்த அந்த Volley Ballஐ மீண்டும் நீரிலிருந்து எடுத்து, தன் கையில் கசிந்து கொண்டிருந்த இரத்தத்தால், அதில் ஒரு மனித முகத்தை அவன் வரைகிறான். அந்த பந்திற்கு‘Wilson’ என்று பெயரிடும் Chuck, அதை ஒரு இடத்தில் வைத்து விட்டு, அதனுடன் பேச ஆரம்பிக்கிறான்.

பேச்சுத் துணைக்குக் கூட யாரும் இல்லாமல் தான் மட்டும் அந்த தீவில் தனியாக இருக்கும் சூழ்நிலையில், மனித முகம் வரையப்பட்டிருக்கும் அந்த Volley Ballஐ, உயிருடன் தனக்கு அருகில் அமர்ந்திருக்கும் ஒரு மனிதன் என்று மனதில் கற்பனை பண்ணிக் கொள்கிறான் Chuck. ஒரு மனிதனிடம் பேசுவதைப் போல அவன் தன் மனதிலிருக்கும் எல்லா விஷயங்களையும் பேசுகிறான். தன் மனக் குறைகளைக் கூறுகிறான்... விமான விபத்தின் காரணமாக தான் அந்த தீவில் மாட்டிக் கொண்ட அவலத்தை விவரிக்கிறான்... பசியாலும், தாகத்தாலும் தவித்துக் கொண்டிருப்பதை உருக்கத்துடன் கூறுகிறான்... எங்கோ இருக்கும் தன் உயிருக்குயிரான Kelly ஐப் பார்க்க முடியவில்லையே என்ற ஏக்கத்தை வெளியிடுகிறான்... தன் விதியை நினைத்து சோகத்துடன் சிரிக்கிறான்... ஆள் அரவமற்ற அந்தத் தீவிலிருந்து தப்பித்துச் செல்வதற்கு என்ன வழி என்பது புரியாமலிருக்கும் தன்னுடைய நிலையை நினைத்து அழுகிறான். எல்லாவற்றையும் ஒரு நண்பனுடன் பகிர்ந்து கொள்வதைப் போல அந்த Volley Ball இடம் கூறி, மனதிலிருந்த சுமைகளை இறக்கி வைத்து விட்ட நிம்மதியுடன் அவன் இருக்கிறான்.

கற்களை உரசச் செய்து, கற்கால மனிதர்கள் செய்ததைப் போல அவன் நெருப்பு உண்டாகச் செய்கிறான். சாப்பிடுவதற்கு எதுவுமே இல்லாத சூழ்நிலையில் நீருக்குள் இறங்கி மீன்களைப் பிடித்துக் கொண்டு வருகிறான். மீனை நெருப்பில் சுட்டு உண்ணுகிறான். அதன் மூலம் அவனுடைய பசி தீர்கிறது. தாகத்தை அடக்குவதற்குத்தான் கடல் நீர் இருக்கிறதே?

நாட்கள் கடந்தோடுகின்றன. ஆரம்பத்தில் சதைப் பிடிப்புடன், மிடுக்காக இருந்த Chuck மிகவும் மெலிந்து போய் விடுகிறான். ஆரம்பத்தில் அவன் அணிந்திருந்த ஆடைகளெல்லாம் நைந்து போக, ஒரு சிறு துணியை மட்டும் இடுப்பில் சுற்றிக் கொண்டு அவன் இருக்கிறான். தாடி முடி வளர்ந்து நீளமாக காட்சியளிக்கிறது. தலையில் முடி ஏராளமாக புதரைப் போல வளர்ந்திருக்கிறது. மொத்தத்தில் - நாகரீகம் என்ற ஒன்று தோன்றியிராத காலத்தில், ஆதி மனிதன் எப்படி இருந்தானோ, அப்படிப்பட்ட ஒரு கோலத்தில் இருக்கிறான்  Chuck.

நெருப்பில் குளிர் காய்வது, கடல் நீரைப் பருகுவது, கடலில் நீந்திச் சென்று மீன் பிடிப்பது, பிடித்த மீனை நெருப்பில் வேக வைத்து சாப்பிடுவது, வரையப்பட்ட மனித முகத்துடன் இருக்கும் Volley Ball உடன் உரையாடுவது- இப்படியே அவனுடைய நாட்கள் நீங்கிக் கொண்டிருக்கின்றன.

நான்கு வருடங்கள் கடந்தோடுகின்றன. இப்படியே அந்த தீவிலேயே இருந்து கொண்டிருந்தால் எப்படி? அங்கிருந்து கிளம்பிச் செல்வதற்கு என்ன வழி என்று அவன் யோசிக்கிறான். மானத்திலிருந்து கடலுக்குள் விழுந்த‘portable toilet ’ இன் ஒரு பகுதி ஒரு ஓரத்தில் கிடக்கிறது. அதை எடுத்த Chuck, அந்தப் பகுதியுடன் சில மரத்துண்டுகளைக் கொண்டு வந்து கயிறுகளால் இறுக கட்டுகிறான். அதன் மூலம் ஒரு மிதவை தயாராகிறது. எல்லாவற்றையும் தயார் பண்ணி வைத்து விட்டு, கிளம்புவதற்கான கால நிலை எப்போது சரியாக இருக்கும் என்பதை எதிர்பார்த்து அதற்காக காத்திருக்கிறான். புயலிலோ, சூறாவளியிலோ சிக்கிக் கொள்ளக் கூடாதே! நாட்கள் நகர்கின்றன. உரிய கால நிலை வருகிறது. இப்போது கிளம்பினால் சரியாக இருக்கும் என்று ஒரு நாள் மனதில் பட, தான் உருவாக்கிய அந்த மிதவையில் ஏறி அமர்ந்து தன் பயணத்தை அவன் ஆரம்பிக்கிறான்.

தான் நான்கு வருடங்கள் தனி மனிதனாக நடந்து திரிந்த, உலாவிய, துள்ளிக் குதித்த, அழுத, ஆதி மனிதனாக வாழ்ந்த, குமுறிக் கொண்டிருந்த, புதிய மனிதனாக ஆன... அந்த தீவிலிருந்து பிரியா விடை பெற்று அவன் தன் பயணத்தைத் தொடர்கிறான். பல நாட்கள் பயணம் தொடர்கிறது. இரவு, பகல், வெயில், குளிர், மழை என்று பயணம் தொடர்ந்து கொண்டே இருக்கிறது. திடீரென்று ஒரு சூறாவளி... அதில் அந்த மிதவை அலைக்கழிக்கப்படுகிறது. மிதவையே உடைந்து சின்னா பின்னமாகி விடுமோ என்ற நிலை. Chuck ம் நீருக்குள் விழுந்து தத்தளிக்கிறான். எங்கே கடலுக்குள் மூழ்கி, உயிரை விட்டு விடுமோ என்ற சந்தேகம் அவனுக்கு உண்டாகி விடுகிறது. உயிரைக் கையில் பிடித்துக் கொண்டு, எப்படியாவது பிழைத்தாக வேண்டும் என்ற வெறியுடன் அவன் நீரில் நீந்தி, மீண்டும் மிதவையின் மீது ஏறி அமர்கிறான். அப்போதுதான் அவனுக்கே தெரிகிறது -  தான் மிகவும் கவனமாக தன்னுடன் எடுத்துக் கொண்டு வந்து, மிதவையின் ஒரு பகுதியில் வைத்த ‘வரையப்பட்ட மனித முகத்தைக கொண்ட அந்த Volley Ball’ கடல் நீருக்குள் விழுந்து விட்டது என்ற உண்மை. அவன் கவலையுடன் பார்க்கிறான். தூரத்தில் நீரில் அந்த Volley Ball மிதந்து, தத்தளித்துக் கொண்டிருக்கிறது. ஆனால், அது இருப்பது அவனிடமிருந்து மிகவும் அதிகமான தூரத்தில்... எனினும் அவன் விடுவதாக இல்லை. மீண்டும் நீருக்குள் இறங்கி, அந்த Volley Ballஐ நோக்கி மிதந்து செல்கிறான். ஆனால், அதற்குள் அந்த Volley Ball நீருக்குள் போய் விடுகிறது. கடந்த நான்கு வருடங்களாக தன்னுடைய நெருங்கிய நண்பனாக இருந்து... தன்னுடைய சந்தோஷங்களையும், துக்கங்களையும் பகிர்ந்து கொண்ட அந்த  Volley Ballலின் பிரிவைத் தாங்க முடியாமல், அவன் குமுறிக் குமுறி அழுகிறான்.

அவனுடைய பயணம் தொடர்கிறது. பயணத்தின்போது, ஒரு சரக்கு கப்பல் கடந்து சென்று கொண்டிருக்கிறது. அதைப் பார்த்து Chuck உரத்த குரலில் கூச்சலிடுகிறான். அவனைப் பார்த்தவர்கள், அவன் ஏதோ ஆபத்தில் சிக்கியிருக்கிறான் என்பதைப் புரிந்து கொள்கிறார்கள். அவனுக்கு உதவ அவர்கள் முன் வருகிறார்கள்.

Chuck நகரத்திற்கு அழைத்து வரப்படுகிறான். நான்கு வருடங்களுக்குப் பிறகு தனக்கு அறிமுகமான முகங்களை அவன் பார்க்கிறான். சூறாவளியில் சிக்கி விபத்திற்குள்ளான விமானத்தில் பயணம் செய்த சிலர் உயிருடன் அப்போது காப்பாற்றப்பட்டும் இருக்கிறார்கள் சிலர் இறந்தும் போயிருக்கின்றனர். Chuck ஐ பல இடங்களிலும், கடலில் தேடியிருக்கிறார்கள். இறுதி வரை கண்டு பிடிக்கவே முடியவில்லை. கடைசியில் அவன் இறந்து விட்டான் என்று நினைத்து அவனுக்கு இறுதிச் சடங்குகளைக் கூட அவனுடைய குடும்பத்தைச் சேர்ந்தவர்கள் செய்து முடித்து விட்டார்கள்.

இதில் அதிர்ச்சி தரக் கூடிய விஷயம் என்னவென்றால்- அவனுடைய காதலியாகவும், மனைவியாகவும் இருந்தவளும், உடலின் பாதியாக இருந்தவளும், ஒன்றாக குடித்தனம் நடத்தியவளுமான Kelly, Chuck ன் பல் மருத்துவரைத் திருமணம் செய்து கொண்டு, ஒரு மகளையும் பெற்றெடுத்திருக்கிறாள். Chuck திரும்பி வந்தது குறித்து Kellyக்கு சந்தோஷமும், அதிர்ச்சியும் உண்டாகிறது. அவள் இன்னும் அவன் மீது அன்பும், காதலும் வைத்திருக்கிறாள். அவனை மறக்காமலும் இருக்கிறாள். ஆனால், ஒருவனுடன் திருமணமாகி குழந்தையுடன் இருக்கும் அவள், Chuck உடன் எப்படி வாழ முடியும்?

அவர்கள் இருவரும் பிரிவதைத் தவிர, வேறு வழியே இல்லை. தாங்கள் இருவரும் முன்பு ஒன்றாக பயணம் செய்த, ஒன்றாகச் சுற்றிய, பல சந்தோஷங்களைக் கண்ட காரின் சாவியை  Kelly, Chuck இடம் ஒப்படைக்கிறாள். மழை பெய்து கொண்டிருக்கும் அந்த இரவு நேரத்தில் தன் மீது இப்போதும் காதலுடன் இருக்கும் Kelly யிடம், ‘இப்போது உனக்கென்று அமைந்திருக்கும் வாழ்க்கையில் நீ தொடர்வதுதான் சரியானது’ என்று கூறி விட்டு, பிரியா விடை பெற்று கிளம்புகிறான் Chuck.

Chuck பயணம் செய்து, நகரத்தைத் தாண்டியிருக்கும் கிராமப் பகுதிக்கு வருகிறான். தான் இதுவரை பிரிக்காமல் தன்னுடன் கடந்த நான்கு வருடங்களாக வைத்திருந்த FedEX கூரியரின் பெட்டியை, அதில் எழுதப்பட்டிருந்த, அதை அனுப்பியவரின் முகவரிக்குப் கொண்டு செல்கிறான். அந்த முகவரி இருந்த வீடு ஆள் யாரும் இல்லாமல் வெறுமனே கிடக்கிறது. அதனால், அந்த பெட்டியை வாசல் கதவிற்கு அருகில் வைத்த அவன், அந்தப் பெட்டிதான் தன் உயிரைக் காப்பாற்றியது என்று அதற்கு அருகில் எழுதி வைக்கிறான்.

அங்கிருந்து கிளம்பி அவன் நான்கு சாலைகள் பிரியக் கூடிய ஒரு முனையில் வந்து நிற்கிறான்- காருடன். ட்ரக் ஒன்றில் வரும் ஒரு பெண் அவனிடம் ஒவ்வொரு சாலையும் எங்கு போகக் கூடியவை என்பதை விளக்கி கூறுகிறாள். அப்போது Chuck அந்தப் பெண்ணின் truck ஐப் பார்க்கிறான். அதில் வரையப்பட்டிருக்கும் படமும், தான் அந்த வீட்டில் வைத்து விட்டு வந்த பெட்டியில் இருந்த படமும் ஒன்று என்பதை அவன் உணர்கிறான்.

Chuck தன்னைச் சுற்றி இருக்கும் ஒவ்வொரு சாலையையும் பார்க்கிறான். பின்னர் என்ன நினைத்தானோ, truck இல் வேகமாக சென்ற அந்தப் பெண் சென்ற திசையை நோக்கி, அவன் தன் பயணத்தைத் தொடர்கிறான்...

இந்தப் படம் தொடர்ந்து படமாக்கப்படவில்லை. Chuck கதாபாத்திரத்தில் நடித்த Tom Hanks சதைப் பிடிப்பான ஒரு நடுத்தர வயது கொண்ட மனிதனாக தெரிய வேண்டும் என்பதற்காக, அப்படிப்பட்ட உடல் நிலையில் அவர் ஆரம்பத்தில் படமாக்கப்பட்டார். அதற்குப் பிறகு ஒரு வருட காலம் படப்பிடிப்பு நிறுத்தப்பட்டது. தீவில் இருக்கும்  Tom Hanks படமாக்கப்பட இருந்ததால், அவர் தன் உடல் எடையை மிகவும் குறைத்துக் கொண்டார். தலையில் முடி புதரென வளர்ந்திருக்க, நீண்ட தாடி உண்டாக, அதற்குப் பிறகு மெலிந்து போன Tom Hanks தீவில் நடித்த காட்சிகள் படமாக்கப்பட்டன.

Cast Away படத்தின் ‘தீவு’ சம்பந்தப்பட்ட காட்சிகள் Fiji இல் உள்ள Monuriki என்ற தீவில் படமாக்கப்பட்டன. இந்தப் படம் திரைக்கு வந்த பிறகு, அந்தத் தீவு ஒரு சுற்றுலா இடமாக மாறிவிட்டது. இந்தப் படத்திற்கு பிறகு FedEX என்ற பெயர் ஆசியாவிலும், ஐரோப்பாவிலும் மிகவும் பிரபலமாகி விட்டது.

இந்த படத்தில் நடித்ததற்காக Tom Hanksக்கு சிறந்த நடிகருக்கான Golden Globe Award கிடைத்தது.

Academy விருதுக்காகவும், Bafta விருதுக்காகவும் Tom Hanks இன் பெயர் சிபாரிசு செய்யப்பட்டது.

Kelly Frears  ஆக மிகவும் அற்புதமாக நடித்திருந்தார். Helen Hunt. அதிலும் Tom Hanks ஐ Helen பார்க்கும் உச்சக் காட்சி இருக்கிறதே! படம் பார்ப்போர் அந்தக் காட்சியை எந்தக் காலத்திலும் மறக்கவே முடியாது!

ஒரு Volley Ballஐக் கூட ஒரு கதாபாத்திரமாக்கி, அதற்கு Wilson என்ற பெயரையும் சூட்டி அதை படம் முழுக்க இடம் பெறச் செய்த புதுமைக்காக நிச்சயம் நாம் இப்படத்தின் screen writer ஆன William Broyles, Jr. ஐப் பாராட்டியே ஆக வேண்டும்.

 Robert Zemeckis மிகவும் திறமையாக இயக்கியிருக்கும் ‘Cast Away’  நம் உள்ளங்களில் எப்போதும் நிரந்தரமாக வாழ்ந்து கொண்டிருக்கும்.

 Tom Hanksம்தான்.

……………………………